防暴警要求外籍人士講中文


「港版國安法」實施首日,警方喺銅鑼灣多處拉起封鎖線,仲無端生事咁要市民自己行入封鎖線入面。近半散仔警毅進畢業 、被嘲笑「毅進仔」的前線警員,因為叫唔郁個鬼佬(外籍男)行入封鎖線,就用英語兇個鬼佬,「問」佢「You are HK police?」,仲要「問」成4次。鬼佬反問佢點解要限制佢去邊,可能班警員聽唔明英語,最尾竟然當眾叫個鬼佬轉channel「講中文」,真係醜出國際嘞。

其中一條網上影片見到,一群警員拉起封鎖線之後,發覺漏咗個鬼佬,竟然叫對方自行入去。鬼佬不解,反問警員有咩權,但警員一味只識叫佢「go inside」,仲配合埋手勢,示意對方自己行入封鎖線。鬼佬自然不為所動,仲話警方條橙色封鎖線好「stupid」。

警員就大曬警權,話而家佢企緊嘅位,係警方負責嘅,仲用句錯晒grammar嘅英語,兇個鬼佬:「You are Hong Kong police?(你係咪香港警察?)」不過警員似乎唔知句嘢有問題,一共「問」咗鬼佬4次。鬼佬好無奈,話自己係「free citizen」,但繼續追問警員,點解要限制佢去邊。

可能警員同鬼佬糾纏咗差唔多成分鐘,都聽唔明鬼佬問乜,最尾竟然當眾叫個鬼佬「講中文」,仲自動幫佢拉起條封鎖線,圍返佢入去。

現場一班市民聽到都覺得好「新奇」,大嘆「國際城市都可以咁嘅水準」、「嗌人哋(鬼佬)講中文」。其餘警員可能見講英文嘅鬼佬終於入返封鎖線,先敢出聲叫同袍影低啲市民。但八方相信,最後都係冇一位警員可以解答到鬼佬嘅問題。

《香港法例》第5章《法定語文條例》第3條:
法定語文與其地位與應用
(1)現予宣布︰在政府或公職人員與公眾人士之間的事務往來上以及在法院程序上,中文和英文是香港的法定語文。 (由1995年第51號第2條修訂)

《香港法例》第232A章 《警察(紀律)規例》第I部第3條:
(2)違紀行為指 ——
(j)在執行職責的過程中,或在關乎警隊履行任何職責或職能方面,作出在要項上屬虛假的陳述;

相關事件:0701七一大遊行

蘋果日報(報道)